وەزیری دەرەوەی ئێران: ئامادەین بۆ هەردوو بژاردەی شەڕ و ئاشتی

سەید عەباس عێراقچی، وەزیری دەرەوە، لە چاوپێکەوتنێکدا لەگەڵ "ئیندستان تودەی"، لە وەڵامی ئەو پرسیارەدا، با لە وتارەکەی سەرۆک ترامپەوە دەست پێ بکەین؛ درێژترین وتارەکەی، بەڵام تێیدا ئێرانی ئاگادار کردەوە. ئایا ئێران ئامادەیە؟ وتی: سەرەتا سوپاسی بانگهێشتەکەت دەکەم. لە وەڵامی پرسیارەکەتدا بێگومان ئامادەین. ئێمە بە تەواوی ئامادەین بۆ هەردوو بژاردەکە؛ شەڕ و ئاشتی.

وەزیری دەرەوە وتی: پێموایە ڕێککەوتنێکی دادپەروەرانە و هاوسەنگ مومکینە و دەتوانین بەدەستی بهێنین، بێگومان هێزە چەکدارەکانمان ئامادەن بۆ ئەنجامدانی کاری خۆیان و ئێمەش دەزانین چۆن بەرگری لە خۆمان بکەین، هەروەک چۆن جاری ڕابردوو کردمان، زۆر شت لە جەنگی ڕابردوو فێربووین، بۆیە ئێستا زیاتر ئامادەکاریمان کردووە.

عێراقچی ڕایگەیاند: "لە ڕاستیدا ئەوە مانای ئەوەیە کە ئامانج ڕێگریکردنە لە شەڕ. کاتێک ئامادەیت بۆ شەڕ، دەتوانیت ڕێگری لێبکەیت؛ ئەگەرنا بانگهێشتت کردووە بۆ ناو ماڵەکەت. بۆیە ئێمە بە تەواوی ئامادەکاریمان کردووە، نەک لەبەر ئەوەی شەڕمان دەوێت، بەڵکوو لەبەر ئەوەی دەمانەوێت ڕێگری لە شەڕ بکەین. من پیاوێکی دیپلۆماسیم. دەبێت باسی کارەکانم بکەم و پێموایە ئەو ڕێگایەی کە گرتوومانە باشترین ڕێگایە بۆ چارەسەرکردنی ئەم کێشەیە".

وتیشی: "هیچ بژاردەیەکی سەربازی نییە بۆ بەرنامەی ئاشتیانەی ئەتۆمی ئێران، ئەگەر نیگەرانییەک هەبێت، ئەگەر پرسیارێک هەبێت، ئەگەر ناڕوونییەک هەبێت، ئامادەین چارەسەری بکەین، ئێمە ئامادەین وەڵامی پرسیارەکان بدەینەوە. ئێمە ئامادەین بۆ چارەسەرکردنی نیگەرانییەکان، بەڵام ئامادە نین دەستبەرداری مافی خۆمان بین بۆ بەکارهێنانی ئاشتیانەی تەکنەلۆژیای ئەتۆمی. ئەمە هەڵوێستی ئێمەیە و خواستی ئێمەیە. بۆیە من باوەڕم وایە کە سبەینێ لە جنێڤدا ئەگەری گەیشتن بە چارەسەرێکی ڕێککەوتوو و دادپەروەرانە و هاوسەنگ هەیە”.